No Está Solo de Sandro Dazieri

No está solo, de Sandrone Dazieri (2015)

Esta sorprendente novela engancha desde o inicio, guiada por dous protagonistas fóra do común e unha historia orixinal e cargada de xiros.

Este verán descubrín a Sandrone Dazieri. Sentinme atraído pola trama de “No está solo”  nada máis ler a sinopse e non me decepcionou. Cun ritmo trepidante, un arranque de novela negra que se acaba pasando ao thriller e unha atractiva dupla de personaxes atormentados -dun xeito nada habitual-, formada por Colomba Caselli e Dante Torre; “No está solo” engancha de principio a fin. Está claro que a novela conta con elementos que rozan a inverosimilitude, e por momentos a trama semella demasiado enrevesada, pero a súa axilidade e orixinalidade convértena nunha lectura fenomenal para as vacacións de verán.

 

Nunha época na que estamos acostumados á espectacularización das series de televisión e dos filmes, resulta aceptable e incluso crible que nunha novela deste tipo se introduzcan elementos un tanto esaxerados. En ocasións os capítulos de “No está solo” recordan a unha desas series que non podes deixar de ver durante horas e horas nunha fin de semana calquera de inverno. Son incontables os capítulos que acaban cun xiro impredecible que che impide parar de ler.

Uns protagonistas atípicos

Bombas, asasinatos misteriosos, secuestros e misións científicas secretas configuran un thriller distinto, áxil e espectacular, con todo o bo e malo que ese termo implica. Unha última sorpresa final abre o camiño dunha continuación (“El Ángel”), xa no meu poder, da que espero dar conta próximamente. “No está solo” é sen dúbida unha novela entretida e recomendable. Perfecta para engancharse a ela durante as vacacións.

Engadido: o éxito da saga continúa coa terceira entrega, “El Rey”, que pecha a triloxía adicada á curiosa parella formada por Colomba Caselli e Dante Torre. Outra recomendación para engancharse á lectura durante as vacacións de Nadal.

 

FICHA TÉCNICA


Título

No Está Solo


Autor

Sandrone Dazieri (tradución de Xavier González)


Ano

2.015


Editorial

Debolsillo


Data

2.017


O mellor

A dupla formada por Colomba e Dante


O peor

A trama roza por momentos a inverosimilitude


A miña nota

8/10


Mercar No Está Solo
portada No Está Solo
Portada de "No Está Solo"

Diego Villaverde

Xornalista, aspirante a escritor e opositor de Lingua Castelá e Literatura afincado en Alemaña. Leo máis do que escribo e escribo máis do que estudo.

4 comments

Deixa unha resposta

O teu enderezo electrónico non se publicará Os campos obrigatorios están marcados con *